HomeTamilகேலரி

கேலரி

இறைத்தூதர் முஹம்மது

இறைத்தூதர் முஹம்மது பற்றி குர்ஆன், ஹதீஸின் படிப்பினைகள் கொண்ட போஸ்டர்களை பதிவிறக்கம் செய்யுங்கள். பதிவிறக்கம் செய்ய, போஸ்டரின் மேல் சற்று நேரம் விரலால் அழுத்தி, “டவுன்லோட்” ஐ அழுத்தவும்!

இறைத்தூதர் முஹம்மது (அவரின் மீது இறைவனின் சாந்தி உண்டாகட்டும்) - இறைத்தூதர் முஹம்மது (அவரின் மீது இறைவனின் சாந்தி உண்டாகட்டும்) அவர்கள் இஸ்லாம் என்ற புதிய மதத்தைத் தொடங்கவில்லை. இறைவனுக்கு கட்டுப்பட்டு நடக்கும் வாழ்வியலை, மனிதர்களுக்கு கற்று தர வந்த நீண்ட இறைத்தூதர்களின் வரிசையில், இறுதியாக வந்தவர் தான் இறைத்தூதர் முஹம்மது (அவரின் மீது இறைவனின் சாந்தி உண்டாகட்டும்) அவர்கள். ""ஒவ்வொரு சமுதாயத்திற்கும் ஒரு வழிகாட்டி வந்திருக்கிறார்."" குறிப்பு: நன்மை, தீமை, நற்செயல்கள் பற்றி கற்றுத் தந்து, மனிதர்களுக்கு நல்ல முன்மாதிரியாக வாழ்ந்து காட்ட, இறைவனால் தேர்ந்தெடுக்கப்பட்ட நல்ல மனிதர்கள் தான் இறைத்தூதர்கள். - திருக்குர்ஆன் 13:7

இறுதி இறைத்தூதர் முஹம்மது (அவரின் மீது இறைவனின் சாந்தி உண்டாகட்டும்) அவர்களின் போதனைகள் - 1. நம் எல்லோரையும் படைத்த கடவுள் ஒருவனே. 2. கடவுள் முன் எல்லா மனிதர்களும் சமம். சாதி, மதம், தோல் நிறம், இனம் போன்றவற்றின் அடிப்படையில் கடவுள் மக்களை வேறுபடுத்துவதில்லை. 3. மரணத்திற்குப் பின் உள்ள முடிவில்லாத வாழ்க்கையில், இவ்வுலகில் நாம் செய்யும் எல்லா செயல்களுக்கும், கடவுளுக்கு நாம் பதில் சொல்லியாக வேண்டும். ""இறைவனிடத்தில் (மட்டுமே) உங்கள் தேவைகளை கேளுங்கள்! இறைவனை (மட்டுமே) வணங்குங்கள்! இன்னும் அவனுக்கு நன்றி செலுத்துங்கள்! நீங்கள் இறைவனிடமே (இறந்த பின்) திரும்பக் கொண்டு வரப்படுவீர்கள்!"" - திருக்குர்ஆன் 29:17

எல்லா மனிதர்களையும் மதியுங்கள் - ஒரு (இறந்த) மனிதரின் இறுதி ஊர்வலம் சென்றது. (அதைப் பார்த்த) இறுதி இறைத்தூதர் முஹம்மது (அவரின் மீது இறைவனின் சாந்தி உண்டாகட்டும்) அவர்கள் எழுந்து நின்றார்கள். அங்கிருந்த சிலர் "இது ஒரு யூதரின் இறுதி ஊர்வலம்" என்று கூறினார்கள். அதற்கு இறைத்தூதர் முஹம்மது (அவரின் மீது இறைவனின் சாந்தி உண்டாகட்டும்) அவர்கள்: "அவரும் ஒரு மனிதரில்லையா?" என்று கேட்டார்கள். - புகாரி # 1313

சிறுபான்மையினரின் உரிமைகள் - யூதர்களும், முஸ்லிம்களை போலவே ஒரு சமூகமாக அங்கீகரிக்கப்படுகின்றனர். முஸ்லிம்கள் தங்கள் மதத்தை கடைப்பிடிக்க உரிமை உண்டு. அதே போல், யூதர்களுக்கும் தங்கள் மதத்தை கடைப்பிடிக்க உரிமை உண்டு. தீமையான, அநியாயமான செயல்களை செய்பவர்கள் யாராக இருந்தாலும் அவர்களுக்கு எதிராக முஸ்லிம்கள் ஒன்று திரள்வார்கள். அநியாயம் செய்தவர் முஸ்லிமாக இருந்தாலும், அவருக்கு எதிராக மற்ற முஸ்லிம்கள் ஒன்று திரள்வார்கள். - இறைத்தூதர் முஹம்மது (அவரின் மீது இறைவனின் சாந்தி உண்டாகட்டும்) அவர்களுடைய ஆட்சியில் எழுதப்பட்ட மதினா அரசியல் சாசனம்.

இறைத்தூதர் ஆட்சியில் சிறுபான்மையினர் - கிருஸ்துவர்கள் சிறுபான்மையினராக வாழும் ஏமனிற்கு, முஆத் என்பவரை ஆளுநராக இறுதி இறைத்தூதர் முஹம்மது (அவரின் மீது இறைவனின் சாந்தி உண்டாகட்டும்) அவர்கள் அனுப்பும் போது: ""அக்கிரமத்திற்கு உள்ளானவரின் சாபத்திற்கு பயந்து கொள்ளுங்கள். ஏனெனில், அந்த சாபத்திற்கும் இறைவனுக்கும் இடையே எந்தத் தடுப்பும் இல்லை (அதாவது, பாதிக்கப்பட்டவரின் சாபத்தை கடவுள் ஏற்றுக்கொள்வார் என்பதால் சிறுபான்மையினர் தானே என்று எண்ணி அக்கிரமம் செய்து விடாதீர்கள்.)"" என்று இறைத்தூதர் அவர்கள் முஆத் அவர்களுக்கு அறிவுரை கூறினார்கள்."" - புகாரி # 2448

முஸ்லிமல்லாதவர்களுக்கு பாதுகாப்பு - இறுதி இறைத்தூதர் முஹம்மது (அவரின் மீது இறைவனின் சாந்தி உண்டாகட்டும்) கூறினார்கள்: ""எச்சரிக்கை! முஸ்லிம் ஆட்சியின் கீழ் வாழும் முஸ்லிமல்லாதவர்களை யார் கொடுமைப்படுத்துகிறாரோ, அவர்களின் உரிமைகளை பறிக்கிறாரோ, அவர்கள் மீது தாங்கமுடியாத சுமையை சுமத்துகிறாரோ, அவர்களின் விருப்பமில்லாமல் அவர்களிடமிருந்து எதையும் எடுத்துக் கொள்கிறாரோ, அவருக்காக (முஸ்லிமல்லாதவர்களுக்கு ஆதரவாக) நான் (இறைத்தூதர் முஹம்மது) நியாயத் தீர்ப்பு நாளில் (இறைவனிடத்தில்) வாதாடுவேன்."" - அபு தாவூத் # 3052

கருணையே உருவான இறைத்தூதர் - "பல தெய்வ வழிபாடு செய்பவர்களை சபியுங்கள்" என்று சில மக்கள் இறுதி இறைத்தூதர் முஹம்மது (அவரின் மீது இறைவனின் சாந்தி உண்டாகட்டும்) அவர்களிடம் சொன்னார்கள். "நான் மக்களை சபிப்பதற்காக (இறைவனால்) அனுப்பப்படவில்லை. மாறாக, நான் மக்களிடம் அன்பும், கருணையும் காட்டவே (இறைவனால்) அனுப்பப்பட்டேன்." என்று இறைத்தூதர் முஹம்மது (அவரின் மீது இறைவனின் சாந்தி உண்டாகட்டும்) அவர்கள் பதிலளித்தார்கள். - சஹீஹ் முஸ்லிம் # 2599

மன்னிப்பின் சிகரம் - மக்கா நகர வெற்றியின் போது, ""இன்று கடுமையாக பழிவாங்கும் நாள்."" என்று எதிரிகளின் தலைவரைப் பார்த்து ஒருவர் கூறினார். இதைக் கேட்ட இறுதி இறைத்தூதர் (அவரின் மீது இறைவனின் சாந்தி உண்டாகட்டும்) அவர்கள், தன்னை பல முறை கொல்ல முயன்ற எதிரிகளைப் பார்த்து: "" 'இன்று உங்கள் மீது எந்த குற்றமும் இல்லை' என்று இறைத்தூதர் ஜோசப் அவர்கள் தனது சகோதரர்களிடம் கூறிய அதே வார்த்தைகளை நான் உங்களுக்கும் சொல்கிறேன்."" என்று கூறி அவர்கள் அனைவரையும் மன்னித்தார்கள். தண்டிக்க முழு அதிகாரம் இருந்த போதும் ஒருவரை மன்னிப்பது தான், உண்மையிலேயே சிறந்த மன்னிப்பு. - மக்கா வெற்றி - ரஹீக் அல் மக்தூம்

தனக்காக பழி வாங்கவில்லை - இறுதி இறைத்தூதர் முஹம்மது (அவரின் மீது இறைவனின் சாந்தி உண்டாகட்டும்) தனக்காக என்று யாரையும் பழிவாங்கவில்லை. ஆனால், இறைவனின் சட்ட ஒழுங்குகள் மீறப்படும் பொழுது (அதனால் மக்கள் பாதிக்கப்படும் போது) மட்டும் பழி வாங்குவார்கள். - புகாரி # 3560

இறைத்தூதருடைய எதிரியின் வாக்குமூலம் - இறைத்தூதரின் பரம எதிரியாக இருந்த அபு சுஃப்யான், ரோமபுரி பேரரசர் ஹெராக்ளியஸைச் சந்தித்த போது, ஹெராக்ளியஸ் அவரிடம்: (இறைத்தூதர் என்று தன்னை அறிவிப்பதற்கு முன்) முஹம்மது அவர்களை பொய் சொன்னதாக நீங்கள் எப்போதாவது குற்றம் சாட்டியிருக்கிறீர்களா? என்று கேட்டார். 'இல்லை' என்று அபூ சுஃப்யான் பதிலளித்தார். 'அவர் வாக்கு மீறியதுண்டா? ' என்று ஹெராக்ளியஸ் கேட்டார். 'இல்லை' என்று அபூ சுஃப்யான் பதிலளித்தார். 'அவர் உங்களுக்கு என்ன தான் போதிக்கிறார்?' என்று ஹெராக்ளியஸ் கேட்டார். 'இறைவன் ஒருவனை மட்டுமே வணங்குங்கள். இறைவனுக்கு இணையாக படைப்பினங்களை வணங்காதீர்கள். முன்னோர்கள் பின்பற்றிய அனைத்து மூடப் பழக்கங்களையும் கைவிடுங்கள் என்று அவர் கூறுகிறார். வணக்க வழிபாடு, உண்மை, கற்பு நெறி, உறவினர்களுடன் இணங்கி இருத்தல் போன்ற நற்பண்புகளை எங்களுக்கு ஏவுகிறார்."" என்று அபூ சுஃப்யான் பதிலளித்தார். ""இறைவன் மீது சத்தியமாக! என் தோழர்கள் என்னைப் பொய்யர் என்று முத்திரை குத்துவதைக் கண்டு நான் பயப்படாமல் இருந்திருந்தால், நான் இறைத்தூதரைப் பற்றி உண்மையைப் பேசியிருக்க மாட்டேன்."" என்று அபூ சுஃப்யான் கூறினார். - புகாரி # 7

இறைத்தூதரின் பணிவு - ஒரு மனிதர் இறைத்தூதர் அவர்களை பார்க்க வந்தார். அவர் பேசும்போது அவரது குரல் பயத்தால் நடுங்கியது. இறுதி இறைத்தூதர் முஹம்மது (அவரின் மீது இறைவனின் சாந்தி உண்டாகட்டும்) அவர்கள் அந்த மனிதரிடம்: “சாதாரணமாக இருப்பீராக! நான் அரசன் அல்ல. உலர்ந்த இறைச்சியைச் சாப்பிட்டு வந்த ஒரு பெண்ணின் மகன் தான் நான்." என்று கூறி அவரை சகஜ நிலைக்குக் கொண்டு வந்தார்கள். - சஹீஹ் இப்னு மாஜா # 2693

இறைத்தூதரின் மென்மையான இயல்பு - நான் இறைத்தூதர் முஹம்மது (அவரின் மீது இறைவனின் சாந்தி உண்டாகட்டும்) அவர்களுக்குப் பத்து ஆண்டுகள் சேவகம் செய்தேன். (என் மனம் வேதனைப்படும்படி) என்னைச் "சீ’ என்றோ, 'இதை ஏன் செய்தாய்?' என்றோ, 'நீ இப்படிச் செய்திருக்கக் கூடாதா?' என்றோ அவர்கள் சொன்னதேயில்லை. - புகாரி # 6038

இறைத்தூதரின் எளிமை - இறுதி இறைத்தூதர் முஹம்மது (அவரின் மீது இறைவனின் சாந்தி உண்டாகட்டும்) அவர்கள் தம் ஆடைகளைத் தானே துவைப்பார்கள். அவை கிழிந்தால் தானே தைப்பார்கள். தன் காலணிகளைத் தானே பழுது பார்ப்பார்கள். ஆடுகளுக்கு தானே பால் கறந்து அதை மற்றவர்களுக்கு (தன் கையினாலயே) பரிமாறுவார்கள். பிறர் தங்கள் வீடுகளில் செய்யும் எல்லா வேலைகளையும் செய்வார்கள். - சஹீஹ் ஜாமிஹ் # 4937, 4996

இறைத்தூதர் போரை விரும்பவில்லை - இறுதி இறைத்தூதர் முஹம்மது (அவரின் மீது இறைவனின் சாந்தி உண்டாகட்டும்) கூறினார்கள்: மக்களே! (போர்க்களம் சென்று) எதிரிகளைச் சந்திக்க வேண்டுமென்று ஆசைப்படாதீர்கள். (போரைத் தவிர்க்கின்ற) அமைதி நிலை ஏற்பட இறைவனிடம் பிரார்த்தனை செய்யுங்கள். - புகாரி # 2965

தனக்கு தெய்வீகத் தன்மை இல்லை என்று சொன்ன இறைத்தூதர் - (இறைத்தூதரே! மக்களிடம்) கூறுவீராக: நிச்சயமாக நானும் உங்களைப் போன்ற ஒரு மனிதன் தான்! உங்கள் கடவுள் ஒரே ஒரு கடவுள் தான் என்று எனக்கு இறைச்செய்தி அறிவிக்கப்பட்டிருக்கிறது. யார் (இறந்த பின் உள்ள வாழ்க்கையில் தன்னைப் படைத்த) இறைவனின் சந்திப்பை எதிர்ப்பார்க்கிறாரோ, அவர் நல்ல செயல்களைச் செய்து, (தன்னைப் படைத்த) கடவுளை வணங்கும்போது வேறு யாரையும் (அவனோடு சேர்த்து) வணங்காது இருக்கட்டும். - திருக்குர்ஆன் 18:110

இறைத்தூதரிடம் தெய்வீக குணங்கள் கிடையாது - “இறைவனின் பொக்கிஷங்கள் என்னிடம் உள்ளன என்றும், மறைவானவற்றை நான் அறிவேன் என்றும் உங்களிடம் நான் கூறவில்லை; நான் ஒரு வானவர் (ஏன்ஜெல்) என்றும் கூறவில்லை; எனக்கு அறிவிக்கப்படும் இறைச்செய்தியை மட்டுமே நான் பின்பற்றுகின்றேன்.” என்று (இறைத்தூதரே! மக்களிடம்) கூறுவீராக. - திருக்குர்ஆன் 6:50

தனக்காக பிறர் எழுந்து நிற்பதைக் கூட வெறுத்த ஒரே தலைவர் - இறைத்தூதரிற்கு பத்தாண்டுகள் பணிவிடை செய்த அனஸ் (என்ற இறைத்தூதரின் தோழர்) கூறுகிறார்: "உலகத்தில் இறுதி இறைத்தூதர் முஹம்மது (அவரின் மீது இறைவனின் சாந்தி உண்டாகட்டும்) அவர்களை விட எங்களுக்கு விருப்பமான ஒருவரும் இருந்ததில்லை. ஆயினும் அவர்கள் எங்களை நோக்கி வரும் போது நாங்கள் அவர்களுக்காக எழ மாட்டோம். இதை இறைத்தூதர் அவர்கள் கடுமையாக வெறுப்பார்கள் என்பதே இதற்குக் காரணம். - அதபுல் முப்ரத் # 946

இறைத்தூதர் செய்த சமூக சீர்த்திருத்தம் - இறுதி இறைத்தூதர் முஹம்மது (அவரின் மீது இறைவனின் சாந்தி உண்டாகட்டும்) கூறினார்கள்: அறியாமைக் காலத்தின் எல்லா மூடபழக்கங்களையும், (கடந்த காலத்தில் நடந்த கொலைகளுக்கு) பழிவாங்கும் எல்லா நடவடிக்கைகளையும் என்னுடைய இரண்டு கால்களுக்கு கீழே போட்டு புதைக்கிறேன் (அதாவது அழித்து ஒழிக்கிறேன்). - சஹீஹ் இப்னு மாஜா # 2144

இறைத்தூதரின் பொறுமை - ஒரு கிராமவாசி இறைதூதரின் மசூதியின் உள்ளே சிறுநீர் கழிக்க தொடங்கினார். அந்த கிராமவாசியை தாக்குவதற்காக அவரை நோக்கி மக்கள் விரைந்தனர். இறுதி இறைத்தூதர் முஹம்மது (அவரின் மீது இறைவனின் சாந்தி உண்டாகட்டும்) அவர்கள் மக்களை பார்த்து: ""அவரை விட்டு விடுங்கள். அவர் கழித்த சிறுநீர் மீது ஒரு வாளித் தண்ணீரை ஊற்றி விடுங்கள். (எப்போதும் மக்களிடம்) நளினமாக நடந்து கொள்ளவே நீங்கள் (இறைவனால்) அனுப்பப்பட்டுள்ளீர்கள். (மக்களிடம்) கடினமாக நடந்து கொள்ள நீங்கள் அனுப்பப்படவில்லை."" என்று கூறினார்கள். - புகாரி # 6128

ஒரு யூத பெண் இறைத்தூதருக்கு விஷம் தந்த போது..... - ஒரு யூதப் பெண்மணி, இறைத்தூதர் அவர்களுக்கு விஷம் கலந்த (சமைத்த) ஆடு ஒன்றை அன்பளிப்பாகக் கொண்டு வந்தாள். இறைத்தூதர் அவர்கள் அதிலிருந்து (சிறிது) உண்டார்கள். இறைத்தூதர் அவர்களிடம் அந்த யூதப் பெண் கொண்டு வரப்பட்டாள். ""அவளைக் கொன்று விடலாமா?"" என்று இறைத்தூதர் அவர்களிடம் மக்கள் கேட்டார்கள். ஆனால், இறுதி இறைத்தூதர் முஹம்மது (அவரின் மீது இறைவனின் சாந்தி உண்டாகட்டும்) அவர்கள் ""வேண்டாம்"" என்று கூறிவிட்டார்கள். - புகாரி # 2617

இறைத்தூதர் - எச்சரிக்கை செய்து நற்செய்தி சொல்ல வந்தவர் - இறைவன் நாடினாலே தவிர, நான் எனக்கு ஒரு நன்மையையோ தீமையையோ செய்து கொள்ள சக்தி பெறமாட்டேன். மறைவானதை நான் அறிபவனாக இருந்திருந்தால், நன்மைகளையே அதிகமாகத் தேடிக் கொண்டிருப்பேன். எந்தத் தீங்கும் எனக்கு ஏற்பட்டிருக்காது. இறைநம்பிக்கை உள்ளவர்களுக்கு நான் (இறந்த பின் உள்ள வாழ்வில் தண்டனையாக கிடைக்கும் நரகம் பற்றி) எச்சரிப்பவனாகவும், (இறந்த பின் உள்ள வாழ்வில் வெகுமதியாக கிடைக்கும் சுவர்க்கம் பற்றி) நற்செய்தி கூறுபவனாகவுமே இருக்கிறேன்'' என்று (இறைத்தூதரே மக்களுக்கு) கூறுவீராக! - திருக்குர்ஆன் 7:188

அளவு கடந்து புகழப்படுவதை இறைத்தூதர் விரும்பவில்லை - இறுதி இறைத்தூதர் முஹம்மது (அவரின் மீது இறைவனின் சாந்தி உண்டாகட்டும்) கூறினார்கள்: ""கிறிஸ்தவர்கள் மேரியின் மகன் இயேசுவை (அளவுக்கு மீறிப் புகழ்ந்து கடவுள் நிலைக்கு) உயர்த்திவிட்டதைப் போல், நீங்கள் என்னை உயர்த்தி விடாதீர்கள். ஏனெனில், நான் இறைவனின் அடியான் தான். (அப்படி ஏதாவது என்னைப் பற்றிச் சொல்வதாயிருந்தால்) என்னை இறைவனின் அடியார் என்றும், இறைத்தூதர் என்றும் சொல்லுங்கள்."" - புகாரி # 3445

WHAT OTHERS ARE READING

Most Popular