எந்த தர்மமும் சிறிதல்ல! தர்மமாகப் பெரிய தொகையை வழங்க முடியாத பலர் அதைப் பற்றி வருத்தப்படுகிறார்கள். மற்றவர்கள் அதிக தொகை கொடுப்பதைப் பார்த்து, தங்களின் சிறிய தர்மத்தை குறைவாக நினைக்கிறார்கள். ஒரு தர்மத்திற்கு உண்மையான மதிப்பைக் கொடுப்பது அதன் அளவு அல்ல, மாறாக அதன் பின்னணியில் உள்ள தூய்மையான எண்ணமும் (இக்லாஸ்), அதற்கான கூலி கிடைக்கும் என்ற உறுதியுமே என்று அல்லாஹ் கற்பிக்கிறான்.
மழையின் உதாரணம்
அல்லாஹ்வின் திருப்தியைப் பெறுவதற்காகவும், (அல்லாஹ்விடம் கிடைக்கும் கூலியின் மீது) உறுதியான நம்பிக்கையோடும் தமது செல்வங்களை (நல்வழியில்) செலவிடுவோரின் உதாரணம், உயரமான இடத்தில் அமைந்த தோட்டம். பெருமழை விழுந்ததும் அத்தோட்டம் இருமடங்காக தன் உணவுப் பொருட்களை வழங்குகிறது. பெருமழை விழாவிட்டாலும் ஒரு சிறிய தூறல் (போதும்). நீங்கள் செய்பவற்றை அல்லாஹ் பார்ப்பவன்.
குர்ஆன் 2:265
உதாரணம் கற்றுத் தரும் பாடம்
தூய்மையான எண்ணத்துடன் செலவு செய்வதை, உயரமான இடத்தில் உள்ள ஒரு வளமான தோட்டத்திற்கு அல்லாஹ் ஒப்பிடுகிறான். அதில் பலமான மழை பெய்தால், அது ஏராளமான கனிகளைத் தருகிறது. ஒருவேளை பலமான மழை பெய்யாமல் சிறு தூறல் மட்டும் விழுந்தாலும் கூட, அது ஏராளமான கனிகளைத் தருகிறது.
அதேபோல், தூய்மையான எண்ணத்துடன் செய்யப்படும் தர்மம் ஒருபோதும் அல்லாஹ்விடம் வீணாவதில்லை.
தர்மத்தில் செலவிடப்படும் அதிகமான தொகையை அல்லாஹ் பலமான மழைக்கு ஒப்பிடுகிறான்.
தர்மத்தில் செலவிடப்படும் சிறிய தொகையை அல்லாஹ் தூறலுக்கு ஒப்பிடுகிறான்.
நிலம் வளமானதாக இருக்கும்போது, அதிகமான கனிகள் கிடைக்க ஒரு சிறு தூறல் போதும். பலத்த மழை அவசியம் இல்லை. அதேபோல், உங்கள் சக்திக்கு உட்பட்டு, தூய்மையான எண்ணத்துடன் ஒரு சிறிய தொகையை நீங்கள் கொடுத்தாலும், நீங்கள் ஏராளமான நன்மைகளைப் பெறுவீர்கள்.
எவ்வளவு அழகான உதாரணம் பாருங்கள். சுப்ஹானல்லாஹ்!
எனவே, நீங்கள் எவ்வளவு கொடுக்கிறீர்கள் என்பது முக்கியமல்ல. நீங்கள் ஏன் கொடுக்கிறீர்கள், எவ்வளவு உள்ளத்தூய்மையோடு கொடுக்கிறீர்கள், மக்களின் புகழை எதிர்பார்க்காமல் அல்லாஹ்விற்காக கொடுக்கிறீர்களா என்பதுதான் முக்கியம்.
தூய்மையான எண்ணம் அவசியம்
- தூய்மையான உள்ளதோடு கொடுக்கப்படும் தர்மம்,
- உண்மையான தியாகத்தால் கொடுக்கப்படும் தர்மம்,
- அல்லாஹ்வின் கூலியின் மீதுள்ள நம்பிக்கையால் கொடுக்கப்படும் தர்மம்,
- பிறர் பார்க்க வேண்டும் என்ற ஆசை இல்லாமல் கொடுக்கப்படும் தர்மம்,
சிறிய தொகையாக இருந்தாலும், அது அல்லாஹ்விடம் மிகப்பெரியதாக கருதப்படும்.
அதனால்தான், நாம் ஒரு போதும், தர்மத்தில் கொடுக்கப்படும் சிறிய தொகையை குறைத்து மதிப்பிடக்கூடாது.
ஒன்று ஒரு இலட்சத்தை வென்றது
நபி (ஸல்) அவர்கள் கூறினார்கள்:
ஒரு திர்ஹம், ஒரு லட்சம் திர்ஹம்களை வென்றுவிட்டது.
ஸஹீஹ் ஜாமிஹ் # 3606
அது எப்படி என்று கேட்கப்பட்டபோது, ஒருவரிடம் இரண்டு திர்ஹம்கள் மட்டுமே இருந்தன, அவர் அதில் ஒன்றை தர்மம் செய்தார். மற்றொருவர் தனது பரந்த செல்வத்தின் ஒரு பகுதியிலிருந்து ஒரு லட்சம் திர்ஹம்களை எடுத்து தர்மம் செய்தார் என்று விளக்கினார்கள்.
ஒரு திர்ஹம் கொடுத்த மனிதர், தன்னிடம் இருந்ததில் பாதியைக் கொடுத்தார். மற்றவர் ஒரு பெரிய தொகையைக் கொடுத்தார், ஆனால் அது அவரிடம் இருந்த அபரிமிதமான செல்வத்திலிருந்து வந்தது. எனவே, சிறிய தொகை பெரிய தொகையை முந்தி வென்று விட்டது. ஏனெனில் அதில் பெரிய தியாகமும், ஆழமான அர்ப்பணிப்பும் இருந்தது.
மக்கள் தர்மத்தை எடைபோடுவதைப் போல அல்லாஹ் எடைபோடுவதில்லை. மக்கள் எண்ணிக்கையை பார்க்கிறார்கள். அல்லாஹ் உள்ளத்தையும், கொடுப்பவரின் தியாகத்தையும் பார்க்கிறான்.
பேரீச்சம்பழத்தின் ஒரு துண்டு
நபி (ஸல்) அவர்கள் கூறினார்கள்:
பேரீச்சம்பழத்தின் ஒரு துண்டை தர்மம் செய்தாவது உங்களை நரக நெருப்பிலிருந்து காப்பாற்றிக் கொள்ளுங்கள்.
புகாரி # 1417
தர்மம் செய்யத் தொடங்குவதற்கு முன்பே உங்களிடம் செல்வம் இருக்க வேண்டிய அவசியமில்லை. உங்களிடம் இருப்பதை வைத்தே தொடங்குங்கள். ஒரு பாதி பேரீச்சம்பழம், ஒரு சிறிய தொகை அல்லது ஏழைக்கு ஒரு வேளை உணவு, இது போதும், தர்மம் செய்து விடலாம்.
நபி (ஸல்) அவர்கள் கூறினார்கள்:
தர்மம் செல்வத்தைக் குறைப்பதில்லை.
ஸஹீஹ் முஸ்லிம் # 2588
எனவே நீங்கள் கொடுக்கும்போது பணத்தை இழப்பதைப் பற்றி அஞ்சாதீர்கள்.
சிறிய தொகையை தர்மம் செய்தாலும்…
அல்லாஹ்வுக்காக மட்டும் கொடுங்கள்
பெருமைக்காகவோ, புகழுக்காகவோ அல்லது நற்பெயருக்காகவோ கொடுக்காதீர்கள். அல்லாஹ்வின் பொருத்தத்திற்காக மட்டும் தர்மம் செய்யுங்கள்.
அல்லாஹ் தரும் கூலியை உறுதியாக நம்புங்கள்
தர்மம் செய்யும் போது பணம் குறைகிறதே என்று எண்ணாதீர்கள். அல்லாஹ் அதைத் பன்மடங்காகப் பெருக்கி, அதை உங்களுக்கு திரும்பத் தருவான் என்ற உறுதியான நம்பிக்கையுடன் கொடுங்கள்.
செல்வம் சேரும் வரை காத்திருக்காதீர்கள்
“ஒரு திர்ஹம்” பற்றிய ஹதீஸ், நாம் செய்யும் தர்மம் சிறியதாக இருந்தாலும், பிறர் செய்யும் பெரிய தர்மத்தை விட மேலானதாக இருக்கலாம் என்பதை உணர்த்துகிறது.
முடிந்தவரை மறைமுகமாகக் கொடுங்கள்
மறைவான தர்மம் உளத் தூய்மையைப் பாதுகாக்கிறது, முகஸ்துதியைக் குறைக்கிறது. குறைவான மக்கள் அதை அறியும் போது, உள்ளம் தூய்மையாக இருக்க அதிக வாய்ப்புள்ளது.
முடிவுரை
தூய்மையான எண்ணத்தோடும், தியாகத்தோடும், அல்லாஹ்வின் கூலியின் மீது உறுதியான நம்பிக்கையோடும் செய்யப்படும் தர்மம் அல்லாஹ்விடத்தில் சிறிதல்ல. சிறிய அளவு தர்மமும் அபரிமிதமான நன்மைகளைத் தரும் என்று குர்ஆன் 2:265 வசனம் கற்பிக்கிறது.
ஒரு திர்ஹம் பற்றிய ஹதீஸ், ஒரு சிறிய தர்மம் ஒரு பெரிய தர்மத்தை முந்திவிடக்கூடும் என்று கற்பிக்கிறது.
எனவே, உங்கள் தர்மத்தின் தொகை குறைவாக இருப்பதை குறைத்து மதிப்பிடாதீர்கள். உங்களால் முடிந்ததைக் கொடுங்கள். உளத் தூய்மையோடும், நம்பிக்கையோடும் கொடுங்கள். அல்லாஹ்விடம் எந்தத் தர்மமும் சிறியதல்ல.
அடிக்கடி கேட்கப்படும் கேள்விகள் (FAQs)
தர்மத்தைப் பற்றி குர்ஆன் 2:265 என்ன கற்பிக்கிறது?
அல்லாஹ்வின் திருப்திக்காகவும், அவனது கூலியில் உறுதியான நம்பிக்கையுடனும் கொடுக்கப்படும் தர்மம் ஒரு வளமான தோட்டத்தைப் போன்றது; மழை பலமாகப் பெய்தாலும் அல்லது சிறு தூறலாக விழுந்தாலும் அது தொடர்ந்து பலன் தரும் என்று இது கற்பிக்கிறது. அதே போல், தர்மத்தில் கொடுக்கப்படும் அதிகமான தொகை ஏராளமான நன்மைகளை பெற்று தருவது போல், தர்மத்தில் கொடுக்கப்படும் சிறிய தொகையும் ஏராளமான நன்மைகளை பெற்றுத் தரும்.
சிறிய தர்மம் பற்றி இஸ்லாம் சொல்வது என்ன?
பேரீச்சம்பழத்தின் ஒரு துண்டை தர்மம் செய்தாவது நரக நெருப்பிலிருந்து உங்களைக் காப்பாற்றிக் கொள்ளுங்கள் என்று நபி (ஸல்) அவர்கள் கூறியுள்ளார்கள். (புகாரி # 1417)
தர்மம் செல்வத்தைக் குறைக்குமா?
இல்லை. “தர்மம் செல்வத்தைக் குறைப்பதில்லை” என்று நபி (ஸல்) அவர்கள் கூறியுள்ளார்கள். (ஸஹீஹ் முஸ்லிம் # 2588)
தர்மம் செய்யும் போது நாம் எதை நினைவில் கொள்ள வேண்டும்?
அல்லாஹ்விற்காக மட்டும் தூய்மையான எண்ணத்துடன் கொடுங்கள், அவனிடம் கூலியை எதிர்பாருங்கள், முகஸ்துதியைத் தவிர்த்துக் கொள்ளுங்கள், சிறிய நற்செயல்களைக் குறைத்து மதிப்பிடாதீர்கள்.
