லைலத்துல் கத்ர் அல்லாஹ் கண்ணியப்படுத்திய மிகச் சிறந்த இரவு. இந்த இரவில் அல்லாஹ்வை உளதூய்மையோடு வணங்குபவர்களுக்கு, பாவ மன்னிப்பு கிடைக்கும் என்று நபி ﷺ அவர்கள் வாக்குறுதி அளித்துள்ளார்கள்.
நபி ﷺ கூறினார்கள்:
யார் ஈமானோடும், நன்மையை எதிர்பார்த்தும் லைலத்துல் கத்ர் இரவில் நின்று வணங்குகிறாரோ, அவருடைய முந்தைய பாவங்கள் அனைத்தும் மன்னிக்கப்படும்.
புகாரி #1901
இந்த ஹதீஸ் நம்பிக்கையாளர்களுக்கு பெரும் நம்பிக்கையை அளிக்கிறது. ஒரு இரவு செய்யும் வணக்கம் பல ஆண்டுகால பாவங்களை அழித்துவிடும். அல்ஹம்துலில்லாஹ்!
ஆனால் லைலத்துல் கத்ரில் எல்லா பாவங்களும் மன்னிக்கப்படுமா?
இரண்டு வகையான பாவங்கள்
லைலத்துல் கத்ரில் எந்தெந்த பாவங்கள் மன்னிக்கப்படுகின்றன என்பதைப் புரிந்துகொள்ள, பாவங்களின் வகைகளை நாம் அறிந்து கொள்ள வேண்டும்.
அல்லாஹ்வுக்கும் அடியானுக்கும் இடையிலான பாவங்கள்
இவை ‘ஹகுக்குல்லாஹ்’ (அல்லாஹ்வின் உரிமைகள்) என்று அழைக்கப்படுகின்றன.
உதாரணமாக: தொழுகைகளை விடுவித்தல், ஹராமானவற்றைப் பார்த்தல், வணக்க வழிபாடுகளில் சோம்பேறித்தனம், அல்லாஹ்வுக்கு மட்டுமே தெரிந்த ரகசியப் பாவங்கள்.
உண்மையான ‘தவ்பா’ மற்றும் வணக்க வழிப்பாடுகள் மூலம் அல்லாஹ் இந்த வகையான பாவங்களை மன்னிக்கிறான். லைலத்துல் கத்ர் இத்தகைய பாவங்களுக்கான மன்னிப்பைப் பெற ஒரு சிறந்த வாய்ப்பாகும்.
மற்ற மனிதர்களுக்கு எதிரான பாவங்கள்
இவை ‘ஹகுக்குல் இபாத்’ (மக்களின் உரிமைகள்) என்று அழைக்கப்படுகின்றன.
உதாரணமாக: திருப்பிச் செலுத்தாத கடன்கள், வியாபாரத்தில் ஏமாற்றுதல், புறம் பேசுதல், அவதூறு பரப்புதல், பிறரை உடல் ரீதியாகவோ அல்லது மன ரீதியாகவோ காயப்படுத்துதல், நம்பிக்கைத் துரோகம், இரத்த உறவுகளைத் துண்டித்தல்.
இத்தகைய பாவங்கள் வெறும் வணக்க வழிபாடுகளால் மட்டும் மன்னிக்கப்படாது.
நபி ﷺ அவர்கள் இதனைப் பற்றி எச்சரித்துள்ளார்கள்:
யார் தனது சகோதரனின் மானத்திலோ அல்லது வேறு எதிலுமோ அநீதி இழைத்திருக்கிறாரோ, அவர் தீனாரோ திர்ஹமோ (பணம்) இல்லாத ஒரு நாள் வருவதற்கு முன்பே, அவரிடம் இன்றே மன்னிப்புப் பெற்றுக்கொள்ளட்டும்.
புகாரி # 2449 (ஹதீஸின் கருத்து)
பிறருடைய உரிமைகளை அலட்சியப்படுத்துவதன் ஆபத்து
பலர் ரமலான் மாதத்தில் வணக்கங்களில் மட்டும் கவனம் செலுத்துகிறார்கள். ஆனால் தாங்கள் பிறருக்கு இழைத்த தீமைகளை மறந்துவிடுகிறார்கள். மறுமை நாளில் உண்மையில் ‘திவாலானவர்’ (Bankrupt) யார் என்பதை நபி ﷺ அவர்கள் இவ்வாறு விவரித்தார்கள்:
ஒருவர் தொழுகை, நோன்பு, ஸகாத் போன்ற நன்மைகளுடன் வருவார். ஆனால் அவர் ஒருவரைத் திட்டியிருப்பார், மற்றொருவர் மீது அவதூறு சொல்லியிருப்பார், பிறருடைய சொத்தை அபகரித்திருப்பார். அவருடைய நன்மைகள் அனைத்தும் பாதிக்கப்பட்டவர்களுக்குப் பகிர்ந்து கொடுக்கப்படும்.
முஸ்லிம் # 2581 (ஹதீஸின் கருத்து)
எப்படி சரியாக தவ்பா செய்வது?
நீங்கள் பிறருக்கு ஏதோ ஒருவகையில் தீங்கு இழைத்திருந்தால்:
- முடிந்தால், பாதிக்கப்பட்ட நபரிடம் மன்னிப்புக் கோருங்கள்
- கடன்களைத் திருப்பிக் கொடுங்கள் அல்லது அவருக்கு ஏற்பட்ட சேதத்தை ஈடுசெய்யுங்கள்.
- பல சமயங்களில், பாதிக்கப்பட்ட நபர்களிடம் மன்னிப்பு கேட்க முடியாத சூழ்நிலை இருக்கும். அவர்களுக்காக அல்லாஹ்விடம் உளத்தூய்மையோடு பிரார்த்தனை செய்யுங்கள்.
- ஒருவரைப் பற்றித் தவறாகப் பேசியிருந்தால், மக்கள் மத்தியில் அவரைப் பற்றி நல்லவிதமாகப் பேசி அதைச் சரிசெய்ய முயலுங்கள்.
முடிவுரை
லைலத்துல் கத்ரில் அல்லாஹ்வின் அளவற்ற அருளும் மன்னிப்பும் கிடைக்கிறது. ஆனால் இதில் மன்னிக்கப்படும் பாவங்கள் அல்லாஹ்வுக்கும் அடியாருக்கும் இடையிலான பாவங்களாகும்.
பிற மனிதர்களுக்கு செய்யப்பட்ட பாவங்களுக்கு, பாதிக்கப்பட்டவர்களின் மன்னிப்பு அவசியம். இந்த பரக்கத் மிக்க இரவுகளில் அல்லாஹ்வின் மன்னிப்பை நாம் உண்மையாகவே எதிர்பார்த்தால், நாம் யாருக்கெல்லாம் தீங்கு செய்தோமோ அவர்களிடம் மன்னிப்பு கேட்க வேண்டும். அவர்களுக்கு கிடைக்க வேண்டிய உரிமைகளை மீட்டு கொடுக்க வேண்டும். இதுவே உண்மையான தவ்பா ஆகும்.
அடிக்கடி கேட்கப்படும் கேள்விகள் (FAQs)
லைலத்துல் கத்ரில் கடன்கள் மன்னிக்கப்படுமா?
இல்லை. கடன்கள் திருப்பிச் செலுத்தப்பட வேண்டும் அல்லது கடன் கொடுத்தவர் அதை மன்னிக்க வேண்டும்.
புறம் பேசுவது லைலத்துல் கத்ரில் மன்னிக்கப்படுமா?
புறம் பேசுவது மனித உரிமையுடன் தொடர்புடையது. எனவே பாதிக்கப்பட்டவரிடம் மன்னிப்புக் கேட்க வேண்டும் அல்லது அவர்களுக்காக அதிகமதிகம் துஆ செய்ய வேண்டும்.
‘ஹகுக்குல் இபாத்’ (மக்களின் உரிமைகள்) என்னவெல்லாம் அடங்கும்?
பண கொடுக்கல் வாங்கல்கள், பிறரது கண்ணியம், நற்பெயர், அமானிதம் பேணுதல் போன்றவை இதில் அடங்கும்.
